صمتى
و صمتى مش دايما هروب أوقات كتير بيكون خوف
خوف على نفسى اللى مبقاش فيها مكان لوجع
خوف على قلبى اللى تعب من الألم
خوف من رد فعلك لا يكون أقوى من فعلى أنا
خوف من حروفك لا تنزل نار تزود جروحى بدل ما تداويها
خوف من دمعه محبوسه تنزل من عينى و ترسمها حروفى و تحسها فتلومنى عليها
خوف لا تعاتبنى على الأحلام و يخلص بينا الكلام
خوف من ضعفى و احتياجى للكلام و خوف حتى من الكلام
خوف من حروف ترسم قلب مكسور و تفضح نفس موجوعه و تزود جرح أكبر من الأيام
و مع خوفى بيزيد صمتى و بيزيد اصرارك على الكلام و بينتهى بينا الحال للفراق
فراق من غير عتاب و ازاى هيكون العتاب ما أنا أصلا خايفه من الكلام
مع ان صمتى كلام كتير و دوشه و زعيق و صراخ و دموع.
صمتى انفعالات كتيره محبوسه جوايا من سنين
صمتى كلام كبير مش محتاج حد يسمعه أد ما محتاج قلب يحسه
No comments:
Post a Comment